حوارات

 ( 1 )

بس يا ستي كلمة مني كلمة منه راح....  

ايه إللي حصل أحكي لي 

أبدا أنا رجعت من ألشغل وناوية أعمل لهم كيكة ونقضي وقت حلو أنا وأشرف وألاولاد لقيت ألباشا قاعد يتفرج على ماتش كورة غريب ولابس الوش الخشب

إزيك يا أشرف طبعا ولا سامع ولا شايف 

ـ هيه يا أشرف مش بترد

ـ معلهش يا عايدة أنا مش مظبوط شوية مشاكل فى ألشغل شوية كده

ـ صحيح إنت راجع بدري احكي لي فضفض ايه اللى حصل 

ـ بعدين عايز اتفرج على الماتش

قولت مش معقول أسيبه كده غيرت هدومي ورحت قعدت جنبه 

ـ ما تجيب لنا فيلم بدل ألماتش عقبال ألغدا لما يستوي 

ـ لا  أنا عايز أتفرج على الماتش 

ـ يعني مش هتقول مالك

ـ قولت لك بعدين سيبيني شوية

ـ هو إنت بتتفرج إنت باصص على ألسقف

ـ أنا مبسوط كده إبعدي عني يا عايدة دلوقتي 

قولت أعمل له مانجه بيحبها

ـ أشرف حبيبي عملت مانجه علشان تروق وتقولي مالك

ـ يا ربنا قولت لك سيبيني شوية ومش عايز حاجة أفهمك أزاي وادي ألمانجه

وسيابلك ألبيت بدل ما أرتكب جريمة

تصوري دلق المانجه على ألسجادة إللي لسه مغسولة شوفتي قولت اخرجه من إللي هو فيه

يبقى دا جزاتي 

ياعايدة قولنا كتير لما يتضايق ألرجل مش بيتكلم أبداً على إللي بيضايقه فهو مش هيحكي مشكلته إلا إذا كانت مساعدة  ضرورية لحل ألمشكلة يا إما يبقى هادئ جداً ويدخل لكهفه الخاص يفكر في حل مشكلته يقلبها ولما يلاقي حل يحس بتحسن ويخرج من كهفه

لو مقدرش يوصل لحل  يقوم يعمل أي حاجة علشان ينسى مشكلاته زي يتفرج على ماتش او قراءة رواية او ممارسة لعبة  لتحرير عقله من مشكلات يومه

يعني كويس إنها جت على المانجه طبعا تستنيه لما يرجع وتعتذري له وتسيبي شوية يا عايدة شوية مش خمس دقايق 

( 2 )

بس يا سيدي كلمة مني كلمة منها راحت ..

ايه يا أدهم احكي لي ايه اللي حصل 

أبداً يا سيدي أنا كنت إجازة قولت اعمل غدا حلو مفاجأة على ميعاد رجوع منى 

ـ ازيك يا منى عاملك غدوة حكاية

ـ لا مش هقدر اكل عندي صداع جامد وبطني مقفولة

ـ اجيب لك باندول 

ـ لا مش هيعمل حاجة

ـ نروح لدكتور 

ـ لا منها لله فادية 

ـ ما قولت لك سيبك من الشغل 

ـ هو كل ما اجي احكيلك عن حاجة فى المدرسة تقولي سيبي الشغل

ـ احكي يا ستي

ـ اتاخرت خمس دقايق عن الحصة الاولى علت صوتها و لو ما كنتيش ساكنة جنب المدرسة 

و اللى مضايقني ان سعاد واقفة بتش... ( أدهم قاطعها  

ـ قولتلك الحل تقعدي فى البيت مش محتاجين

ـ وانا قولت لك مش هقعد فى البيت بحب التدريس واحنا معندناش اولاد هقعد اعمل ايه 

انت ساكت طول الوقت ولما بحكي لك تبقى مش طايق نفسك اروح فين انا رايحة لماما 

ـ منى طب نتغدى 

بس شوفت يا سيدي ستات غاوية نكد عايز اريحها عندها صداع  يبقى يا دوا يادكتور مشاكل فى الشغل واحنا مش محتاجين تقعد فى البيت 

يا ادهم يا حبيبي قولنا الست لما تكون تحت ضغظ من أحداث يومها بتدور عن شخص ما تثق به تحكي معاه بالتفصيل  عن مشكلات يومها علشان تشعر بتحسن ولما تشاركها شعورها تشعر فجأة بتحسن...!!! هذا هو أسلوبها فى التعامل مع المشكلات وهى دي علامة حب

زي ما احنا بنشعر بالرضا لما نحل مشاكلنا في الكهف

 منى كانت عايزة شوية طبطبة وتسمع كل التفاصيل وتشاركها شعورها وتحضنها مش عايزة حلول فى اللحظة دي قوم خد الغدا و روح لها عند امها واعرف ايه اللي ضايقها من سعاد واسمع للتفاصيل و مش هوصيك شوية طبطبة

                   (3) 

بس يا ستي كلمة مني كلمة منه رحت.. 

ايه اللي حصل يا عايدة… الخاين..طب واحدة واحدة

من يومين

*اشرف يلا الغدا جاهز 

*حاضر يا عايدة جاي معايا مكالمة

*مين اللي بيكلمك

*واحد صاحبي فى الشغل 

طب قافل عليك الباب ليه

*ابدا بيحكي لي مشكلة  بس طلب تبقى سر

*ايه الاكل الجميل ده 

*بالهنا والشفا

*انت مغيرتش هدومك ليه

*انا شوية ونازل 

*خير

*ام رانيا جارتنا اتوفت 

*ايوا قول كده رانيا اللي كنت هتخطبها قبلي انت بتواصل معاها

*اولا موضوع الخطوبة اتقفل من ساعة ما اتجوزنا يعني عشر سنين ثانيا أنا عمري ما تواصلت معاها او مع غيرها

*لا ما هو بعد ما ربنا فتح عليك يتقلق منك 

*بقولك ايه اهدي ده مجرد واجب عزاء 

*ماشي يا اشىرف 

تاني يوم بعد مارجع من الشغل دخل ياخد دش وانا بصراحة روحت على الموبايل افتش فيه ولسه بمسك الموبايل لقيت رسالة من فندق الشيراتون بتاكد على حجز عشاء مع تورتة على حمام السباحة لفردين طبعا فهمت الخاين رجع لحبيبته رانيا وبيخفف عنها موت امها 

*اشرف انا سيابلك البيت وماشية مقدرش اعيش مع واحد قلبه مع حد تاني الحمد لله ان ربنا كشفك قدامي 

*انا مش فاهم حاجة استنى بس لما أخلص الدش 

انا رايحة لماما و متحاولش تيجي

*يا بنتي اصبري يعني كده فيها اسبوع خصام انت الخسرانة

بس ياستي شوفت نعيش سنين مستحمل واول ما الفلوس تجري في ايدهم يبعونا

بس انت اتأكدي  ان الحجز ده لرانيا امال هيكون لمين طب اديني التليفون الو الشيراتون تمام لوسمحت ان سكرتيرة أ. اشرف بسأل بخصوص الحجز تمام يا افندم احنا بعتنا تأكيد لحجز يوم عشرة أغسطس و التورتة عيد زواج سعيد اشرف وعايدة بس هو بعت من شوية انه احتمال يلغي.. لا ماهو انا بتصل علشان بأكد على الحجز مفيش إلغاء شكرا.. سمعت بنفسك يا متهورة اخترعت قصة فى دماغك و اعتبرتها حقيقة و اخدت قرارات ابقي خلي بالك من اللي بيدور في دماغك هو خيال ولا حقيقة

أشرااااااااااااااااااف   

 #عاطف_عناني

#مدونة_كتابات

#نبض_الكتابة_والمواهب_الهادفة